Бар кінәні Мәсімовке аударып, Самат Әбішті құтқарып қалды – депутат

Мәжіліс депутаты Ермұрат Бәпи 18 жылға сотталған ҰҚК экс-төрағасы Кәрім Мәсімов пен оның 3 орынбасары туралы сөз қозғады.

Бұл туралы Азаттық хабарлайды.

«Қаңтарға байланысты Кәрім Мәсімовпен бірге оның бірінші орынбасары Самат Әбіш неге жауапқа тартылмады? Осы сұрақтың астарында барлық жауап тұр деп ойлаймын. Қаңтардың бар кінәсін Мәсімов пен оның үш орынбасарына аударып, Самат Әбішті құтқарып қалды. Оперативті қызметті сол жүргізуі керек. Кәрім Мәсімов орысша айтқанда «козёл отпущения» - құрбан болып бара жатыр. Әрине, оның Қаңтарға қатысы бар. Ол өзінің тікелей басшысы, Қауіпсіздік Кеңесінің төрағасының тапсырмасын орындады. Ол «Ескі Қазақстан» ырқында жүрді. Ол сотталуға, жауап беруге лайық тұлға. Бірақ кінәнің бәрін Мәсімовке жауып тастап, қалған кінәлілерді құтқарып қалу – арнайы жасалған амал. Қаңтар – ешқашан жабылып қалатын мәселе емес», – деді депутат.

Сонымен қатар, Нұрсұлтан Назарбаевтың немере інісі Самат Әбіштің неге ұсталмағанын да айтты.

«Оған іздеу жарияланған жоқ. Бұл шындықты жабу емес, туысын құтқарып қалу. Бұл әділетсіздік барып тұрған. Егер ҰҚК-нің үлкен лауазымды тұлғалары жауапты болса, неге Самат Әбіш қалып қояды? Ол бірінші орынбасар. Ол ҰҚК-дегі оперативті барлық қызметке жауап беретін адам. Ұсталған үшеу-төртеуін соттап жіберіп, Назарбаев өз інісін алып қалады. Осы әділетті ме? Халық көріп отыр оны», – деп түйіндеді Бәпи.