«Самұрық-Қазына» қорының қызметкерлері елу пайызға қысқарады

«Самұрық-Қазына» қорының қызметкерлері саны екі есеге қысқаратыны айтылды. Қордың ресми сайтының мәліметіне сәйкес, «Самұрық-Қазына» қорының жаңа ұйымдық құрылымы бекітілген.

– Қор қызметкерлерінің саны екі есе, 248-ден 124-ке дейін, ал басқарушы қызметтер саны 10-нан 5-ке дейін қысқарады. Құрылымдық бөлімдер саны 27-ден 18-ге (33 пайыз) қысқарып, «кеңесші» қызметтері жойылды. Бизнес жолындағы кедергілерді жоюға бағытталған тікелей сатып алудың жаңа тәртібі мен қадағалау, маркетинг және импорттың орнын басу ережелері алдын-ала бекітіліп, ҚР Қаржы министрлігі, ҚР Бәсекелестікті қорғау және дамыту агенттігі, «Атамекен» ҰКП-ге қарастыруға жіберілді. Бір көзден сатып алуға негіз болатын себептер қысқарды. Бұл құжаттарды директорлар кеңесі қабылдағасын, қордың корпоратив орталығы сатып алу әдістемесін дайындау, сатып алуларды қадағалау және бақылау функцияларын атқарады, - делінген хабарламада.

Басқарма ҚР Үкіметіне жолданатын қорды реформалау бағдарламасын дайындау мерзімдерін бекіткені де айтылды.

– Сонымен қатар, «Самұрық-Қазына» АҚ Басқармасының 24 қаңтардағы шешімімен «Самұрық-Қазына Инвест» ЖШС бас директоры А.К.Сұлтановтың, Samruk-Kazyna Construction АҚ басқарма төрағасы Б.А.Сандықбаевтың, «Самұрық-Қазына Контракт» ЖШС бас директоры А.Ж.Ақыловтың, «Самұрық-Қазына Бизнес Сервис» ЖШС бас директоры С.К.Елшібековтың уәкілеттіктері мерзімінен бұрын аяқталып, еңбек қатынастары тоқтатылды, - делінген хабарламада.