Самұрық-Қазына әлемнің төрт еліндегі шетелдік өкілдіктерін жабады

«Самұрық-Қазына» ұлттық әл-ауқат қоры әлемнің төрт еліндегі шетелдік өкілдіктерін жауып жатыр.

Қордың қоғаммен байланыс департаментінің директоры Марат Мұхамедсалиев төрт қала - Дубай, Лондон, Бейжің және Мәскеу екенін нақтылады.

Еске салсақ, «Самұрық-Қазына» ҰҚК жаңа ұйымдық құрылымның штат санын 50 пайызға қысқартатынын хабарлаған болатын.

Бұған дейін қор басшысы «Самұрық-Қазынаны» реформалау жоспары ашық ақпарат көздері мен корпоративтік сайтта жарияланатынын хабарлады. Компания қазақстандықтардың сұрақтарына да жауап беруге уәде беріп отыр.

Сонымен қатар, «Самұрық-Қазына» басшысы қорды сақтап қалуға ниетті.

Қасым-Жомарт Тоқаев 21 қаңтарда Нұр-Сұлтанда кәсіпкерлермен кездесуінде «Самұрық-Қазына» қорын түбегейлі реформалау керектігін айтты.

«Мен қорды түбегейлі реформалау міндетін қойдым. Бұл жөнінде Сәтқалиевпен әңгімелестім. Ол реформалау міндетін атқара алмаса, қор жабылады, онымен бірге өзі де кетеді. Қорды реформалау жұмыстарында жеке компаниялар мен жеке кәсіпкерлердің, оның ішінде осында отырғандардың тәжірибесін пайдалану керек» деді президент кездесу барысында.

Сондай-ақ, Тоқаев «Самұрық-Қазына» қорының сатып алуларына ерекше назар аудару керектігін де атап өтті.