«Салық – бұл қауіпсіздік белбеуі»: Жұманғарин жаңа Кодекс жайлы

Премьер-Министрдің орынбасары, Ұлттық экономика министрі Серік Жұманғарин Қазақстандағы жаңа Салық кодексі тек ҚҚС-ты (қосылған құн салығын) көтеру туралы емес екенін мәлімдеді , деп хабарлайды Orda.kz.

Оның айтуынша, құжаттың басты мақсаты – бизнесті көлеңкеден шығару және оның өсуіне серпін беру.

«Естеріңізде ме, бір кездері бәрімізге көлікте қауіпсіздік белдігін тағу керек деген болатын? Бірақ бәрі бірден таққан жоқ қой, солай ма? Ал қазір барлығы көлікке отырып, бірден белдігін тағады. Мұнда да дәл солай. Салықты төле де — тыныш ұйықта. Бұл бірден бәрі түсіне бермейді», — деді Жұманғарин Астанада өткен Салық кодексіне қатысты жиыннан соң. 

Ол Қазақстандағы экономиканың шамамен 16,5%-ы көлеңкеде екенін, бұл көбінесе кәсіпкерлердің салықтан жалтарғанынан болатынын атап өтті.

Министрдің айтуынша, Кодекстегі негізгі жаңалық – ҚҚС мөлшері емес, арнайы салық режиміне деген көзқарастың өзгеруі.

«Адамдар не десе де, ҚҚС-тың төрт пайызға өсуі – бұл көп емес. Бизнестің өзіндік қисыны бар. Алғашқы кезеңде – бұл «әлсіздердің ілесе алмауы» сияқты, яғни кәсіпорын 2–3 жылдан кейін жабылып қалады. 12–14 жыл өмір сүріп, дамып кететін компаниялар өте сирек», — деді ол. 

Оның сөзінше, шағын кәсіпорындар орта бизнеске, одан кейін ірі бизнеске айналудың орнына, керісінше, бөлшектеніп кеткен. Бұл қолданыстағы жүйе бойынша кәсіпкерлерге тиімді болған.

«Жаңа Салық кодексінің басты мақсаты – өсімді ынталандыру. Жеңілдетілген режимде жұмыс істейтін және ірі компаниялармен серіктес болғысы келетіндер жалпыға бірдей белгіленген режимге өтуі керек. Әйтпесе, ҚҚС ірі кәсіпорынға есепке алынбайды, сондықтан олар ондай компаниялармен жұмыс істемейді. Біріншіден – бұл ынталандыру: бизнестің өсуі, басқа санатқа өтуі, байуы. Екіншіден – мемлекеттік қаржыны тұрақтандыру», — деді Жұманғарин.