Салық басқармасы қандай жағдайда мобильді аударымдар бойынша кәсіпкерді ұстайды?

Мемлекеттік кірістер комитеті мобильді төлемдерді қолдану арқылы кәсіпкерлердің есебі қалай жүргізілетінін айтты.

Банктер Қаржы министрлігінің Мемлекеттік кірістер комитетімен бірлесіп, «көлеңкелі» кәсіпкерлерді анықтау критерийін әзірледі. Мұндай ақпаратпен ҚР Қаржы министрлігі Мемлекеттік кірістер департаментінің өкілі Шәкен Ержанов тікелей эфирде бөлісті. Егер адамның жеке картасына 100 түрлі адамнан аударымдар түссе, онда оның аударымдары туралы деректері салық органына беріледі. Сәйкесінше, бұл тұлға заңсыз кәсіпкерлік қызметпен айналысты және салық төлеуден жалтарды деген күдікке ілінетін болады.

«Адам 3 ай қатарынан оның жеке картасына 100 түрлі адамнан төлемдер түскен кезде тәуекелдерді басқару жүйесіне түседі. Қандай соманың келетіні маңызды емес: 1000, 2000, 10 000 теңге, бірақ ай сайын 100 түрлі адам бір адамға ақша жіберсе, жеке тұлға заңсыз кәсіпкерлікпен айналысты деген күдікке ілігеді» деді ҚР Қаржы министрлігі Мемлекеттік кірістер департаменті Мемлекеттік қызметтерді көрсету департаменті басшысының орынбасары Шәкен Ержанов.

Шәкен Ержанов қайырымдылықпен айналысатындар тексерілмейді деп сендірді.

«Қайырымдылықпен айналысатын адамдар, жануарлар құқығын қорғаушылар, ата-аналық төлемдер үшін жалпы декларация 2025 жылы басталады. Жаңа 2023, 2024 жылдан бастап жеке тұлғалар туралы ақпарат жиналмайды және берілмейді» деп атап өтті Шәкен Ержанов.

Мобильді аударымдар туралы не белгілі

Еске салсақ, Сенат депутаттары Салық кодексіне түзетулер енгізді. Жоба аясында Қазақстан мобильді трансферттерге салық салуды көздеп отыр.

Төмендегідей өзгерістер ұсынылды:

• «мобильді төлемдер» түсінігін анықтау;
• мобильді төлемдер арқылы тауарлар мен қызметтерді төлеу үшін онлайн бақылау-кассалық машиналарды пайдалануды заңдастыру;
• кәсіпкерлерді бизнесті жүргізу үшін бөлек шоттарды пайдалануға міндеттеу.

Қаржы министрлігінің айтуынша, бұл жеке тұлғалардың жеке аударымдарын бизнес мақсатында жүзеге асырылатын мобильді төлемдерден бөлуге мүмкіндік береді.

Кейін Kaspi мобильді аударымдар туралы заң жобасына қатысты ең өзекті сұрақтарға жауап берді.