Салтанат Тұрсынбекова: сайлау, үгіт-насихат және әйел президент туралы

Президенттікке үміткер Салтанат Тұрсынбекова журналистердің сұрақтарына жауап беріп, сайлау додасынан алған әсерімен бөлісті.

— Сайлау нәтижелерін күтудегі көңіл-күйім керемет. Біз халықпен белсенді жұмыс жүргіздік, бұл жұмыстың нәтижесіне көңілім толады, — деді Салтанат Тұрсынбекова.

«Уақытыңыз жеткілікті ме?» деген сұраққа ол дайынмын деп жауап берді.

— Менің ойымша, кандидатурасын ұсынған әрбір үміткер өзінің қаншалықты жоғары лауазымға үміткер екенін түсінді. Барлығы дайын болды деп ойлаймын. Мен дайын болдым! Науқанға бөлінген күндер жеке өзім үшін жеткілікті болды. Өйткені біз 12 облысты араласақ та, қалған сегізінде штабымыз белсенді жұмыс істеп тұрды, - деді Тұрсынбекова.

Сондай-ақ ол халықтың құқықтық сауаттылығы мен хабардарлығын арттыруда әлеуметтік желілер мен БАҚ-тың рөлі зор екенін атап өтіп, ғаламторда алған жауабына дән риза екенін жеткізді.

— Жасырмаймын, басында көпшілік: «Әйел президент бола ала ма?» деген сұрақ қойды. Бірақ сайлау кезеңінің соңына қарай бұл менталитеттің өзгеруіне белгілі бір дәрежеде көмектестім деп ойлаймын. Бәлкім, бұл нақты ақпараттың, халықты толғандыратын мәселелердің арқасында болған шығар. Барлық жерде құқықтарды қорғау және заңның үстемдігі өте маңызды. Өнеркәсіп болсын, ауыл шаруашылығы болсын, авторлық құқық болсын, зияткерлік меншікті қорғау болсын – барлық мәселені көтердік. Біз бүгін зорлық-зомбылық, қорлау, маскүнемдік, нашақорлық және құмар ойындарға қарсы тұру мәселелерін көтердік. Тұрғындар кері байланыс беруге белсенділік танытты. Бұл менің электоратымды көбейтуге көмектесті деп ойлаймын. Сайлау кезеңі мен белсенді жұмысымызға байланысты көп дауыс күтемін, - деп түйіндеді сөзін Тұрсынбекова.