Сәкен Мамаштың ісі бойынша сот жабық өтеді

Астанада экс-дипломат Сәкен Мамашқа қатысты сот процесі жартылай жабық форматта өтетін болды, деп хабарлайды Orda.kz.

Мұндай шешімді жәбірленуші тараптың өтінішін ескере отырып судья Артур Абдыханов қабылдады. Соттың мәлімдеуінше, дайындық отырысы ашық өтеді, ал сот тергеуі – жабық есік жағдайында жүргізіледі. Қорытынды үкім көпшілікке ашық отырыста жарияланбақ.

Жәбірленуші Карина Госман бұған дейін қылмыстық іс материалдарында жеке өміріне қатысты интимдік мәліметтер бар екенін айтып, сот процесінің жабық болғанын сұраған.

«Менің екі балам бар. Олар ертең өсіп, сот жайлы оқыса, бұл оларға ауыр соғады», — деген еді ол.

Айыпталушы тарап, керісінше, сотты ашық өткізуді сұрады. Бірақ Сәкен Мамаш өзінің суреті мен жеке деректерінің жария болмауын өтінді.

Сонымен қатар, сот Мамаштың бұлтартпау шарасын жеңілдету туралы өтінішін қанағаттандырмады. Адвокат айыпталушының тергеуге кедергі келтірмегенін, елден кетпек болмағанын алға тартқан. Алайда сот Мамаш үкім шыққанға дейін қамауда қала береді деп шешті.