Сақалды ерлерді кемсіткен атыраулық блогер айыппұл төледі

Атырауда сақалды ер адамдарды балағаттаған блогер Жұлдыз Сағиденге қатысты әкімшілік іс аяқталды, деп хабарлайды Orda.kz  тілшісі.

Әлеуметтік желілерде таралған дау тудырған бейнежазбада Сағиден сақалды ерлердің сырт келбетін өрескел сынап, оларды «әйелдер сияқты», «жиіркенішті» деп атап, олардың еңбекке жарамдылығы мен ер азаматтық қасиеттеріне күмән келтірген. 

Бұл бейнежазба жарияланған соң әлеуметтік желі қолданушылары блогерді сырт келбетіне байланысты кемсітті деп және адамдар тобының ар-намысына нұқсан келтірді деп айыптады. Кейбір заңгерлер бұл әрекетті Қылмыстық кодекстің 131-бабы «қорлау» бойынша қайта саралауды ұсынды. Себебі бейнежазбадағы сөздер ел алдында қорлау сипатында айтылған.

Алайда құқық қорғау органдары Сағиденнің әрекетін ҚР Әкімшілік құқықбұзушылық туралы кодексінің 434-бабының 1-бөлігі «ұсақ бұзақылық» ретінде бағалады. Сот оның кінәсін өзі мойындағанын, құқықбұзушылық туралы хаттаманы, рапорт пен түсініктемелерді ескере отырып дәлелденген деп тапты.

Заңға сәйкес, мұндай құқықбұзушылық үшін 20 АЕК (78 640 теңге) көлемінде айыппұл немесе 5-тен 15 тәулікке дейін әкімшілік қамауға алу жазасы қарастырылған.

«Сот айыпталушының кінәсін мойындауын және өкініш білдіруін жеңілдететін мән-жай ретінде қабылдап, айыппұл сомасын 30%-ға азайтты. Нәтижесінде блогер 55 048 теңге төлеуге міндеттелді. Қаулы заңды күшіне әлі енген жоқ», – деп хабарлады облыстық соттың баспасөз қызметі.

Сонымен қатар, желі қолданушылары блогердің жол ережесін бұзғаны үшін де жауапқа тартылуын талап етті. Ол бейнежазбаны қауіпсіздік белдігін тақпай, көлік жүргізіп отырып түсірген. Сондай-ақ кейбіреулер оның баласының өмірі мен денсаулығына қауіп төндірді деген пікір айтты.

Ашық дереккөздерге сүйенсек, Жұлдыз Сағиденге авто-мектеп тиесілі, енді оны да бойкоттауға шақырғандар табылып жатыр.

Айыппұл салынғанымен, көптеген азаматтар бұл жаза жеткіліксіз деп санайды. Олардың пікірінше, бұл жай ғана тұрмыстық дөрекілік емес, ашық кемсіту мен агрессияның көрінісі болған.