Сайлауалды сыйлықтар: Ердоған тегін газға уәде берді

Түркия басшысы келесі айда үй шаруашылықтарын барлық газ төлемдерінен босатуға уәде берді.

Сайлау науқаны қарсаңында Түркия президенті Режеп Тайып Ердоған сәуірдің 20-сы күні Қара теңіз кен орындарынан елдің энергетикалық жүйесіне газ жеткізіле бастағанын мәлімдеп, тұрғын үйлерді тегін газбен қамтамасыз етуге уәде берді, деп хабарлайды Orda.kz  Reuters агенттігіне сілтеме жасап.

«Бір жыл бойы тұрмыстық тұтыну үшін айына 25 текше метрге дейін тегін табиғи газ береміз», - деді Ердоған солтүстіктегі Зонгулдак провинциясындағы газ портының ашылуында.

Ердоғанның айтуынша, Түркияның Қара теңіздегі газ кен орындары бастапқыда тәулігіне 10 миллион текше метр газ өндірген. Дегенмен, алдағы жылдары өндіріс көлемі тәулігіне 40 миллион текше метрге дейін өседі.

«Толық қуатқа жеткенде біз жылына ішкі тұтынудың шамамен 30 пайызын қамтамасыз ете аламыз», - деді ол.

Бұқаралық ақпарат құралдары бұл рәсім түрік үкіметінің сайлау қарсаңында ірі энергетикалық жобаларды көрсетуге жасаған соңғы әрекеттерінің бірі болды деп жазады. Ердоған Түркияның «энергетикалық тәуелсіздік жолында үлкен қадам жасағанын» айтты.

Соған қарамастан, қоғамдық сауалнамаға қарағанда, Ердоған сайлауда жеңіліп қалуы мүмкін. Әзірге 74 жастағы оппозиция кандидаты Кемал Кылычдароғлу көш бастап тұр.

Түркияда президент сайлауы 14 мамырда өтеді. Ердоған соңғы тоғыз жыл бойы президент болды.