Сайлау күні қоғамдық тәртіпті 20 мыңға жуық полицей қадағалайды

Қазақстан Республикасы Ішкі істер министрлігі дауыс берудің тыныш жағдайда өтуін қамтамасыз ету бойынша қабылданған шаралар туралы айтты.

Қазақстан Республикасы Ішкі істер министрлігі Әкімшілік полиция комитеті төрағасының орынбасары Жандос Мұраталиев «Біздің ел – біздің таңдау!» онлайн телемарафоны барысында сайлау кезінде бұзушылықтардың бар немесе жоқтығы туралы жедел ақпарат берді.

— Ішкі істер органдары сайлау кезеңінде құқықтық тәртіпті қамтамасыз етуге міндетті. Біз еліміздің барлық сайлау учаскелерінде қоғамдық тәртіптің сақталуын қамтамасыз етеміз. Қызметкерлер тәулік бойы кезекшілікте, 20 мыңға жуық полиция қызметкері жұмылдырылған, - деді Мұраталиев.

Сайлау учаскелеріндегі оқиғаларға ден қою үшін мобильді жедел-тергеу топтары құрылды. Көшелер мен қоғамдық орындардағы сақшылар саны да көбейді.

— Маршруттар мен адам көп жиналатын орындарға, сондай-ақ сайлау учаскелері маңына патрульдер қойылды. Қоғамдық орындар мен көшелерді патрульдеу үшін ішкі істер органдарының 14 мыңға жуық қызметкері шықты, - деп түсіндірді Мұраталиев.

Сондай-ақ ол полицияның Жедел басқару орталықтарының бейнебақылау камералары арқылы көшелер мен сайлау учаскелерін визуалды бақылау күшейтілгенін атап өтті. Тәртіп сақшылары бейнетіркегіштермен жабдықталған, дрондар қолданылады.