Сайлау қарсаңында ақтөбелік белсенді 10 тәулікке қамалды

Азаматтық белсенді Берік Ноғаев Ақтөбе облысы Мұғалжар аудандық сотының шешімімен 10 тәулікке қамалды. Бұл туралы ORDA. Ақтөбе облыстық сотына сілтеме жасай отырып хабарлайды.

Ноғаевқа «Қазақстан Республикасының бейбіт жийындарды ұйымдастыру мен өткізу тәртібі туралы заңнамасын бұзды» деген Әкімшілік құқық бұзушылық туралы кодекстің 488-бабы 7-тармағы бойынша айып тағылып отыр.

«Берік Ноғаев халықты сайлау өтетін - 10 қаңтар күні орталық стадион мен облыс әкімдігі алдындағы алаңға митингіге шақырған. Бұл хабарламаны ол 6 қаңтар күні Telegram желісінде «Дядя Боря» деген лақап атпен таратқан. Ноғаев мұндай құқық бұзушылықты бір жылдың ішінде екінші рет қайталап отыр», - деп хабарлады Ақтөбе облыстық соты.

Азаматтық белсенді Берік Ноғаев әуелі 6 қаңтарда ұсталып, ол туралы Qaharman.kz адам құқықтарын қорғау қоры хабарлаған. Қордың мәліметінше, Берік Ноғаев Мұғалжар аудандық ішкі істер бөлімінде үш сағат ұсталған соң босатылған. Келесі күні оны полицияға шақыртып, әкімшілік іс қозғалып, сол жерден уақытша қамауға алынды.  

Ол Мұғалжар ауданының орталығы Қандыағаш қаласында тұрады. Ноғаев өзі тұратын қаладан 100 шақырым жердегі Ақтөбе қаласындағы билікке қарсы митингілердің тұрақты қатысушысы. Бүған дейін де Қазақстандағы Қытай жобаларына, жердің шетелдіктерге жалға берілуіне қарсы шығып, бірнеше мәрте қамауға алынған.

«Жалған аккаунттардағы жазбаларға Ноғаевтың қатысы жоқ. Белсендінің азаматтық позициясы ұнамағандықтан билік оны сайлау қарсаңында әдейі оқшаулап отыр», - дейді Qaharman.kz адам құқықтарын қорғау қорының жетекшісі, құқық қорғаушы Дана Жанай.

Сонымен қатар, жергілікті құқық қорғау ұйымдары және өзге де қоғамдық ұйымдар сайлау қарсаңында бақылаушы болуға ниет білдірген адамдарға қысым көрсетіліп жатқанын айтады.

Естеріңізге сала кетсек, бұған дейін Орталық сайлау комиссиясы қаулы шығарып, онда бұрғынғыдай кез келген қоғамдық бірлестік сайлауға бақылаушы жібере алмайтынын, бақылаушылардың фото және видеоға түсіре алмайтынын мәлімдеген болатын.