Саяси белсенділер Қазақстан билігіне санкция салуды сұрады

Саяси белсенділіктеріне кедергі жасағаны үшін және «әділетсіз сот шешімдеріне» наразылық танытқандар 23 ақпан Нұр-Сұлтанда жиналып, Еуропарламентке үндеу жолдайтындарын мәлімдеді. Олар Қазақстан шенеуніктеріне санкция салынуын сұрамақшы. Бұл туралы Азаттық хабарлады.

«Нұр Отанды» сынға алғаны үшін түрмеден жақында босап шыққан белсенді Санавар Закирова:

– Еуропарламентке үндеу жасайтынымыз хабарлағаннан кейін Қазақстанның түрлі өңірінен адамдар хабарласып, үндеуге қосылғысы келетінін айтты. Сол себепті алдағы бір-екі аптада олардың басын қосып, біріккен үндеу жасаймыз.

Біз, Қазақстан азаматтары, Еуропарламент депутаттарынан мемлекет шенеуніктері мен «Нұр Отан» партиясына жеке санкция салу туралы өтініш жасағымыз келеді. Олар біздің конституциялық құқықтарымызды, азаматтық және мүліктік құқықтарымызды дөрекі, негізсіз түрде бұзды.

Жиынға түрлі аймақтардан адамдар жиналған. Олардың бірі Қызылорда тұрғыны Зинагүл Құтмамбетова:

– Тергеу абақтысына қамалған сап-сау ұлымнан айырылдым. Ал ұлымның өліміне кінәлілер әлі күнге дейін жазаланбаған. Ақырғы демім таусылғанша әділдік орнауы үшін күресемін, деді.

Еске салсақ, 11 ақпанда Еуропарламент отырысында Қазақстандағы адам құқығы сынға алынған. Сонымен қатар, құқық бұзуға қатысы бар лауазымды тұлғаларға санкция салуға үндеген. Отырыста «Қазақстандағы адам құқықтары жөніндегі» қарар қабылданды.

Оны жергілікті сарапшылар мен құқық қорғаушылар «кейінгі жылдардағы ең объективті құжат» деп таныса, билік «теріс ұстанымдағы саясаткерлер ұсынған» деген пікір білдірді.