Саясатта Дикий Арман секілді азаматтар керек – Дәулет Тұрлыханов

Дәулет Тұрлыханов Дикий Арманмен Сербияның Белград қаласындағы кездесуі туралы айтты. Сонымен қатар Тұрлыханов саясатта Дикий Арман секілді азаматтардың керек екенін мәлімдеді.

Бұл туралы Тұрлыханов Talk Like бағдарламасына берген сұхбатында айтты.

– Ол кезде Белградта күрес федерациясының үлкен конгресі өткен. Мұнымен қатар бокстан әлем чемпионаты жүріп жатты. Қонақ үйдің астындағы дәмханада отырғанда Арманды көріп қалдым. Ол келіп, амандасты. Бірге суретке түстік. Кейін боксшыларға сыйақысын беріпті. Енді Дикий Арман туралы жаман ештеңе айта алмаймын. Себебі өз көзіммен көрген жоқпын, алып-қашпа әңгімеге ілеспеймін, – деді ол.

Еңбек сіңірген жаттықтырушы саясатта Арман секілді азаматтарға мүмкіндік беру керек дейді.

– Саясатта Арманға ұқсаған тіпті одан асып түсетін азаматтарға мүмкіндік беру керек. Өйткені өсіп келе жатқан жастарға қарау қажет. Егер бақылау болмаса, жастар бірігіп, түрлі топтар пайда болады. Айтайын дегенім, қазақтың жас батырлары керек. Өкінішке қарай, қазір ешкімді батыр деп айта алмаймыз. Бұл – мемлекеттің кемшілігі, – дейді Тұрлыханов.