Саясат үшін төбелес: екі қазақстандық әйелге 120 мың доллар айыппұл салынуы мүмкін

Анталиядан Астанаға бағытталған ұшақта төбелес болып, олар Эрзурумға жедел қонуға мәжбүр болды. Қазақстандық екі азаматша екі украиндықпен төбелес шығарды, деп хабарлайды TGRT Haber телеарнасы.

14 ақпанда Pegasus Airlines әуе компаниясының ұшағы, салонында басталған жанжал төбелеске ұласқан соң, қонуға мәжбүр болды. Төбелескен төрт адам ұшақтан түсіріліп, жергілікті ауруханаға медициналық тексеруден өткізіліп, кейін полиция бөлімшесіне жеткізілді. Барлық тәртіпсіздер ұшақтан түсірілген соң, ұшақ Астанаға жол тартқан болатын.

Енді осы Pegasus Airlines әуе компаниясының ұшағында жанжал шығарған екі қазақсьандық әйелге 120 мың доллар көлемінде айыппұл салынуы мүмкін.

Танымал түрік басылымы  Clash Report оқиғаның мән-жайын баяндады. Басылымның хабарлауынша, төбелеске саяси келіспеушіліктер себеп болған.

«Pegasus Airlines ұшағында Анталиядан Астанаға бағыт алған екі ресейшіл қазақстандық әйел мен украиндық жұп арасында саяси пікірталас туындап, арты төбелеске ұласты. Әуе кемесі шұғыл түрде Эрзурумға қонып, барлық төрт жолаушы ауруханаға жеткізілді, кейіннен олар полицияға тапсырылды» деп жазады Clash Report.

Түрік ақпарат көздері Pegasus Airlines әуе компаниясы төбелестің басталуына себепкер болған жолаушылардан айыппұл өндіріп алмақ ниетте екенін хабарлады. Мәжбүрлі қону мен әуе кемесінің жанармай құюына кеткен шығын 120 мың доллар болады.