«Саяхаттауға татитын ел»: Әлемдік журнал Қазақстан жайлы не жазды?

Әлемге әйгілі туристік басылымдардың бірі Dove Travel Қазақстанды өмірде бір рет болса да барып көруге татитын 10 үздік елдің қатарына қосты.

Dove Travel мақаласында Қазақстанның неліктен саяхаттауға тұрарлық ел екені жайлы кеңінен баяндады. Мақалада қазақ халқының бай мәдениеті мен ғасырлар бойғы дәстүріне баса назар аударылды.

Әрине, көшпелі өмірден сыр шертетін тарихымыз саяхаттауға тұрарлық ел деп мойындалуға мұрындық болып отыр. Мақалада Қазақстанның көркем табиғатының алуан түрлілігі де жазылды. Ұлан-ғайыр даламыздағы Маңғыстау сынды таулы өңірлері мен көркем жерлерінің суреттері журнал бетіне шықты. 

Kazakh Tourism атақты туристік басылымға еліміздің енуі жайлы instagram парақшаларында пікір қалдырды.

«Бұл беделді тізімге ену Қазақстанның бай мәдениеті мен таңғажайып табиғатының, сонымен қатар, туристік әлеуетінің жоғары деңгейде танылуының айқын дәлелі», — деді Kazakh tourism ұлттық компаниясы.

Қазақстанда әлем елдерін таңдандыратын таңғажайып өңірлер жетерлік. Алматы қаласының маңындағы Шарын шатқалы, Көкшетаудағы Бурабай, Алматыдағы Көктетөбе сынды жерлері адамдар толассыз баратын көркем жерлер.

Статистикаға назар аударсақ, 2023 жылы Қазақстанға 9,2 миллион адам келіпті. Шетелдік қонақтардың тек 5,7%-ы саяхаттауға, қалғаны туыстарына келгені анықталды. Қазақстанға саяхатшылар негізінен Ресей, Қытай, Түркия және Үндістаннан келеді.

Халықаралық деңгейге мойындау Қазақстанның туристік саласының дамуына сүбелі үлес қосары анық. Dove travel — әлемдегі туризм жайлы ең атақты журналдардың бірі. Қазақстанның сол журналда үздік ТОП-10 елдің қатарында болуы әлемнің түпкір-түпкірінен туристерді тартатыны анық.
Бұл сондай-ақ экономикаға, жергілікті бизнестің дамуына және қазақ мәдениеті мен тарихын әлемге танытуға болатын зор мүмкіндік.