Сағынтаев тауға шығу қауіпсіз болуы тиіс екенін ескертті

Алматы әкімі Бақытжан Сағынтаев Instagram-дағы өзінің парақшасында туристерге өркениетті жағдай жасау мақсатында тау инфрақұрылымын дамыту қажет екенін айтты.

«Қауіпсіздікті қамтамасыз етіп қана қоймай, тау жорығын қызықты әрі танымды ету үшін Горельник пен Аюсай шатқалдарында визит-орталықтар ашамыз», - деп жазды Алматы әкімі.

Әкімнің айтуынша, 2021 жылы қосымша 170 шақырымға жуық тау соқпақтарын абаттандыру және 4 кэмпинг аймақтарын құру жоспарлануда. Сондай-ақ, тау туризмін дамыту бойынша екі жобаны іске асыру қолға алынады. Олар - Medeu Resort туристік және Butakovka Med сауықтыру кешендері. Бұлардан өзге, «ЦСКА» тау шаңғысы базасын модернизациялау және қала тұрғындарының спорттық-ағартушылық белсенділігін арттыру жоспарлануда. Мұнда шаңғымен сырғанауға, тюбингпен (үрлемелі тау шанасы-ред.) айналысуға, жаз айларында садақ атуға, атқа мінуге және велосипед тебуге болады.

Қонақ үй бизнесін дамыту аясында биыл 4 қонақ үй кешенін пайдалануға беру жоспарланған. Бұл 4 жұлдызды Novotel Living, Ramada Encore by Wyndham қонақ үйлері мен бюджеттік саяхатшыларға арналған 3 жұлдызды IBIS, Holiday Inn Express қонақ үйлері. Жалпы, Алматыда туристерді орналастыратын 328 орын бар, оның ішінде қонақ үйлер, хостелдер және санаторийлер де бар.