Алматы қаласының әкімі Бақытжан Сағынтаев тұрғындармен кездесу барысында қала тұрғынының «Алтын Орда» базарының жанынан өткел салу туралы сұрағына жауап берді. Жас жігіт осы кептеліске байланысты күніне төрт сағатының жұмысқа келіп-кетуге кететінін айтып шағымданды.

«Алтын Орда» базарының айналма жолы барлығымызды шаршатты. Қалаға келгелі Алтын Орданың жолы қашан шешіледі деген мәселені естіп келе жатырмын. Өкінішке орай, Алтын Орда базары қалаға жатпайды. Ол Алматы облысының жері. Мен де сол жолдың шешілуін күтіп жүрмін. Оның жұмысы министрліктің құзыретінде. Министрлік мердігер компанияны таңдаған, ақшасы жеткілікті. Бірақ мердігердің күші жетпей ме, басқасы ма, берген ақшаны игермей әлі келе жатыр. Өткенде Премьер-министр мырза келгенде осы мәселені тағы көтердік. Алматылықтар үшін қалаға кіріп-шығу қиынға соғып отыр. Егер бұл жол бітсе, бір мәселені шештік деп есептейміз», – деді Бақытжан Сағынтаев.

Алтын Ордадағы өткелдің құрылысы 2017 жылы басталды. Жоба бойынша жүріс бөлігін 10 жолаққа дейін, эстакадасы бар бір бұрылыс сақинасы, бұрылыс эстакадасы, Ақсай өзені арқылы өтетін көпір және үш жаяу жүргінші өткеліне дейін кеңейту жоспарланып отыр.

Жұмыстың аяқталуы үнемі кейінге шегеріліп келеді. Жақында «Қазавтожол» ҰК жол торабының құрылысын 2021 жылдың соңына дейін аяқтау жоспарланып отыр деп хабарлады. Жобаға 10,8 миллиард теңге бөлінді.

Бөлісіңіз: