Сақтандыру есебінен 1238 әйел ЭКО жасата алады

Енді Қазақстандық әйелдерге экстракорпоральды ұрықтандыру рәсімінің қолжетімділігі артпақ. Осыған дейін тегін медициналық көмек шеңберінде ғана жасалатын жоғары технологиялық қызметтің бұл түрі 2020 жылдан бастап медициналық сақтандыру пакетіне қосылды.

- "Әлеуметтік медициналық сақтандыру қоры" КЕАҚ Алматы қалалық филиалының басшысы Тілеухан Әбілдаевтың айтуынша, экстракорпоральды ұрықтандыру бағдарламасы 2010 жылдан бастап мемлекеттік тапсырыс бойынша жүзеге асырылып келді. Биыл еліміз бойынша 7000-ға жуық үміткер «Аңсаған сәби» арнайы президенттік бағдарламасы шеңберінде ЭКО жасатып, ата-ана бақытын сезінуге мүмкіндік алмақ.

Мәселен, 2020 жылы Алматы қаласында 643 ЭКО жасалған. Оған 563 млн теңге бөлінді. Биыл жоспар бойынша 1238 отбасы қарастырылмақ. Оған қажет қаржы 2 есе артып, 1,1 млрд теңге болып отыр, - деді филиал директоры.

Биыл оңтүстік астана бойынша аталған бағдарламаға медициналық сақтандыру қорымен келісімшарт бекіткен 7 медициналық ұйым қатысып жатыр:

- «Private clinic» ЖШС;

- «Акушерлік, гинекология және перинатология ғылыми орталығы» АҚ;

- «PERSONA» ЖШС;

- «Экомед» фирмасы» ЖШС;

- «Репродуктивтік медицина институты» ЖШС;

- «Клиника AMD» ЖШС.