Сәуле Әбілдаханқызы үйлі болған 9 жасар бала теріс ағымға түсіп кете ме деп қорқатынын жазды

Журналист Сәуле Әбілдаханқызы өзінің парақшасында елді елжіреткен 9 жасар балаға шүйлікті.

Еске салсақ, 9 жасар Оразымбет халықтан үй алып беруін сұрап, «өскенде үйді қайтарып беремін» деп елді елжіреткен.

Журналистің айтуынша, ол баланың үйлі болғанын білгенде қуанып қалған, бірақ артынша бір дүние оны ойландырған.

«Бір кішкентай балапанға халық үй сыйлапты, жүрегі жарыла қуанып, рахмет айтып тұрған балақанның видеосын көріп қалдым. Құтты болсын! Өсіп-өніп, жаңа шаңырағы қарашаңыраққа айналсын! Анасы аман болсын! Бір адам қуанса, қуанамыз ғой. Ал ана мен баланың қуанғаны – Құдайдың қуанғаны. Тек… әлгі баланың алғыс айтқан видеосын қарап отырғанда, «қап, әттеген-ай!..» деген бір түйткіл тұрды көкейде» дейді Сәуле Әбілдаханқызы.

Ол кішікентай баланың екі сөзінің бірінде «Аллах, Иншаллах, Машаллах, жәннат…» сияқты араби сөздер қолданатынын алға тартып, үйді «сақалиттер» сыйға тартқан болар деген болжам жасаған.

«Өзегіне құрт боп түспесе екен. Жүрегіне нұр боп құйылса екен. Балалардың, жеткіншектердің өзегі берік болуы, әртүрлі ағымның жетегінде кетпеуі – отбасымен бірге мектеп мұғалімдеріне бірдей байланысты. Бүгін мектеп оқушыларының өзегіне ұлттық нәрді құймасақ, ертең ол вакуумға «қоқыс» толады да, міне, сол кезде нағыз қасірет, нағыз трагедия болады. Ол кезде Тәуелсіздігіміз де бәйгеге тігіледі. Балапандарды араби уағыздан сақтайықшы!» деп жазды журналист.