Сәуірдің соңында жеңіске жетеміз – Арестович

Украина президенті кеңсе басшысының кеңесшісі Алексей Арестович Украина Ресей әскерін жеңіп, тойлайтын күнін атады.

Бұл туралы ол ақпараттық телемарафон эфирінде айтты.

– Сәуір айының соңы – мамырдың басы. Біз оларды жеңіп, олардың сағы сынғанын түсінгенде, осындай аралық жеңіс болады деп ойлаймын, – деді ол.

Арестовичтің айтуынша, бұл соғыс қимылдарын тоқтатуды білдірмейтін шығар, бірақ бұл олардың әскери әрекеттерінің соңы екені барлығына түсінікті болмақ.

Бүгін таңертең Арестович Украинадағы ресейлік әскерилердің белсенді соғыс қимылдары екі-үш аптада аяқталуы мүмкін екенін айтты.

Еске салсақ, Ресей президенті Владимир Путин Донбас республикалары басшыларының үндеуіне жауап ретінде арнайы әскери операция жүргізу туралы шешім қабылдап, Украинаға қарсы соғыс жариялады. Алайда Ресей басшысы Мәскеудің жоспарында Украина аумақтарын басып алу жоқ екенін айтқан болатын.

2 наурыз күні таңертеңгі жағдай бойынша Ресей әскері 5840 адамынан айрылды. Сондай-ақ, 60-тан астам ұшақ пен тікұшақ, 862 бронетранспортер, 85 артиллериялық жүйе және басқа да көптеген техника жойылды. 28 ақпандағы жағдай бойынша 352 бейбіт тұрғын, оның ішінде 16 бала қаза тауып, 2040 адам жарақат алды.

Украина президенті Владимир Зеленский Ресей әскерінің шабуылдың алғашқы сағаттарынан бастап азаматтық инфрақұрылымға соққы беріп жатқанын айтты. Президенттің айтуынша, Ресей басқыншы әскерлерінің Украинадағы әрекеттерінде геноцид белгілері бар.

27 ақпанда Украина «басқыншылықты ақтау мақсатында геноцид ұғымын бұрмалағаны үшін Ресейді жауапқа тартуды» талап етіп, Халықаралық сотқа Ресейге қарсы шағым түсірді. Ресейдің Украинаға басып кіруіне қатысты тергеуді Халықаралық қылмыстық соттың прокуроры Кәрім Ханның өзі бастады.