СҚО аялдамада мас отырған басқарма басшысын жұмыстан шығаруы мүмкін

Солтүстік Қазақстан облысының Әдеп жөніндегі кеңесі мас күйінде анықталған басқарма басшысын жұмыстан босатуға кеңес берді.

7152.kz хабарлауынша, полицейлер Табиғи монополияларды реттеу комитетінің Солтүстік Қазақстан облысы бойынша департаментінің директоры Абай Балабековті ұстаған.

Басқарма басшысы былтыр қазан айында аялдамада мас күйінде ұйықтап қалған. Бірақ ол орындықта ұйықтамағанын алға тартты. Нәтижесінде шенеунікке қоғамдық орынға мас күйінде шыққаны үшін 5 АЕК көлемінде айыппұл салынды.

Полиция хабарламасында қылмыскердің жұмыссыз екені көрсетілген. Әдеп жөніндегі кеңесте Абай Балабеков одан жұмыс орны сұралмағанын айтты.

«Мен қонаққа бардым, шығып отырып, такси күттім. Өзімді нашар сезініп, аялдамаға барып отырдым. Ұйықтаған жоқпын, жәй ғана көзімді жұмдым.  200-300 грамм ішуге ешкім тыйым салмайды. Әсіресе жұмыстан тыс уақытта» деді шенеунік кеңеске түсіндіру кезінде.

Абай Балабеков өзінің медициналық карта бойынша жүрек ауруымен ауыратынын айтты. Алайда, кеңесте шенеунікке 2020 жылдың желтоқсанында мас күйінде көлік жүргізгені үшін тағайындалған 15 тәулікке қамауға алу және жеті жылға жүргізуші куәлігінен айыру жазасы қолданылғаны туралы еске салды.

«Бiрiншi бөлiм басшысы мұндай жағдайлардан аулақ болып қана қоймай, өз бөлiмiнде бұл қызметтi үйлестiруi керек. Өздерiңiздiң бөлiмшелерiңiздiң, жалпы мемлекеттiк қызметтiң имиджiне нұқсан келтiрдiңiз» дедi басқарма төрайымы Елена Степаненко.

Кеңес мүшелерінің бірауыздан қабылданған шешімімен шенеунікті қызметінен босату ұсынылды.