Сәкен Майғазиев Шымкент мәдениет үйінің директоры қызметінен босатылды

Сәкен Майғазиев Шымкент мәдениет үйінің директоры қызметінен босатылды, деп Шымкент қалалық мәдениет басқармасы өз Instagram парақшасында мәлімдеді.

Бұл туралы Orda.kz хабарлады.

– Майғазиев Сәкен Қордабайұлы шығармашылық жұмыстардың қарқын алуына байланысты «Шымкент қалалық мәдениет үйі» концерттік ұйымы» МКҚК директоры лауазымынан өз өтініші бойынша ерікті түрде босатылды, - делінген хабарламада.

Ал әншінің өзі әзірге жұмыстан шығуына қатысты ешқандай пікір білдірмеген.

Еске салсақ, ол бұл қызметке 2020 жылдың желтоқсан айында тағайындалған.

Артынша наурызда Сәкен Майғазиев басқаратын Шымкент қалалық мәдениет үйінің Наурызға арналған іс-шараларға 595 млн теңге қаржы бөлгені анықталып, қоғам ішінде дау тудырған. Оны белсенділер мемлекеттік сатып алу порталындағы ресми деректеріне сүйеніп есептеген.

Сондай-ақ, шілдеде әнші өзін «жемқор» деп атаған белсенді Аружан Дүйсебаеваны сотқа берген. Ал тамызда өз арызын қайтып алған.