Сәкен Бибосынов жеңілгені үшін елден кешірім сұрады

Токио олимпиадасында қола медаль еншілеген боксшы Сәкен Бибосынов журналистер сұрағына жауап беріп, халықтан жеңілгені үшін кешірім сұрады.

Бұл туралы Orda.kz Olympic.kz сайтына сілтеме жасап хабарлайды.

52 келі салмақ дәрежесінде жұдырықтасқан боксшы бар күш-жігерін салғанын айтты.

– Токио Олимпиадасына алтын аламын деп келгем. Бірақ қола жүлде бұйырып тұр екен. Жанкүйерлерді, қазақ халқын алтынмен қуантып, Токио төрінде әнұранымызды ойнатуды басты мақсат еттім. Өкінішке қарай, ол арманыма жете алмадым. Бар күш-жігерімді салдым. Соңына дейін жұдырықтастым. Бірақ сәттілік жетпеді.

Барша жанкүйерден, барша халықтан жеңілгенім үшін кешірім сұраймын. Бірінші раундты қарсыласқа беріп қойдым, қалған екі раундта аянып қалмадым.

Бапкерлерім бірінші кезеңнен соң 5:0 ұтылып жатқанымды айтқан соң, одан сайын алға бастым. Енді қола жүлдені қанағат тұтамыз. Бұл менің бірінші Олимпиадам. Тіпті, Токиоға бара алмай қалуым да мүмкін еді. Жолдаманы ең соңғы сәтте жеңіп алғанымды білесіздер. Сондықтан, бәріне қанағат. Бапкерімді, халқымды қуантқым келген. Бұйырғаны қола екен. Жүлдемді барша қазақстандықтарға арнаймын. Осы Олимпиадаға келген соң туған ағам қызды болды. Жеңгем босанды. Айлин деген кішкентай қарындасыма да осы медалімді арнаймын, - дейді спортшы.

Сәкен Бибосынов соңғы кездесуінде ұлыбританиялық Джалал Яфаимен жұдырықтасып жеңілген болатын.