Сәкен Бибосынов Токио Олимпиадасының қола жүлдегері атанды

Қазақстандық боксшы Сәкен Бибосынов 52 келіге дейінгі салмақ дәрежесінде Олимпиада турнирінің жартылай финалдық кездесуін өткізді. Ол қарсыласынан ұтылып, Олимпиаданың қола жүлдегері атанды.

Бұл туралы Orda.kz Sports.kz-ке сілтеме жасап хабарлады.

Сәкен Бибосынов бұл жекпе-жекте Ұлыбритания боксшысы Галал Яфаймен кездесті. Бірінші раундта қазақстандық нокдаунға есептелді, нәтижесінде төрешілер бірауыздан раундты Яфайға берді. Екінші раундта 3:2 есебімен Бибосынов басымдыққа ие болды. Жекпе-жек нәтижесі бойынша британдық 3:2 есебімен жеңіске жетті. Яфай әрі қарай финалда өнер көрсетеді, ал қазақстандық боксшы «қоланы» қанжығасына байлады.

Бұл Қазақстан олимпиадалық құрамасының қоржынындағы бесінші медаль. Барлығы қола. Бұған дейін қазақстандық ауыр атлеттер Игорь Сон мен Зульфия Чиншанло Олимпиаданың қола жүлдегері атанды. Дзюдошы Елдос Сметов пен боксшы Қамшыбек Қонқабаев та қола медаль иеленді.