Сәбит Арынов «ҚазТрансОйл» басшысы міндетін атқарушы болып тағайындалды

Сәбит Арынов «ҚазТрансОйл» АҚ бас директорының міндетін атқарушы, басқарма төрағасы болып тағайындалды. Бұл туралы Қазақстан қор биржасының (KASE) сайтында хабарланды.

«ҚазТрансОйл» АҚ KASE-ге мынаны хабарлады:

«ҚазТрансОйл» АҚ бас директорының міндеттері уақытша «ҚазТрансОйл» АҚ бас директорының орынбасары, басқарма мүшесі Арынов Сәбит Әбілдаұлына жүктелсін».

Сонымен қатар, компанияның директорлар кеңесінің құрамы өзгерді. Бұрынғы бас директор Димаш Досанов өз бастамасымен оның құрамынан шығарылды.

Енгізілген өзгерістерді ескере отырып, «ҚазТрансОйл» АҚ директорлар кеңесінің құрамына бес адам енді: Берлібаев Д.А., Оразбеков М.А., Фрейсин Адриан, Агостини Алвес Винисиус, Мартинес Лопес Альберто.

Сәбит Арынов 2018 жылдан бері компания бас директорының орынбасары қызметін атқарды.