Рыбакина: Қай елде дүниеге келетінімді мен таңдаған жоқпын

Мәскеуде дүниеге келген қазақстандық теннисші Елена Рыбакина «Уимблдондағы» жеңісінен кейін Ресей мен Путинге деген көзқарасы туралы сұраққа жауап берді.

Спортшыға Путиннің әрекеті мен соғысқа деген пікірі туралы сұрақ қойылды. Рыбакина ағылшын тілін толық меңгермегенін алға тартып сұрақты толық түсіне алмағанын жеткізді.

— Мен Қазақстанның атынан шыққанымды және дүниеге келетін жерді өзім таңдамағанымды айта аламын. Маған адамдар сенді және Қазақстан мен қолдады. Бүгін мен өте көп қолдау сөздерін естідім, туды көрдім және бұл сұраққа басқаша қалай жауап берерімді білмеймін, - деді ол.

Еске салсақ, 9 шілде күні Қазақстанның спорт әлемінде ерекше сәт болып, теннистен әлемдік деңгейде Елена Рыбакина жеңіске жеткен еді. Қоғам ішінде «легионерлікке» және спортшының жетістігіне қатысты сұрақтар пайда болған. Ал, Қазақстан теннис федерациясының президенті Болат Өтемұратов «бұл таңғаларлық жағдай емес» деген еді.