Руслан Берденовке оқ атқан Жиенбай тергеуде қысым көргенін мәлімдеді

Шымкентте қала әкімінің орынбасары Руслан Берденовке жасалған қастандыққа қатысты атышулы қылмыстық іс бойынша сот өтіп жатыр, деп хабарлайды Orda.kz тілшісі. 

Соттың алдын ала тыңдалымына Руслан Берденовтің өзі келмеді. Қастандық жасады деп айыпталған Ернар Жиембай сот залында өзін түсіруге тыйым салды. Кісі өлтіруге оқталу бойынша айыпталып жатқан 30 жастағы Жиембай алқабилердің қатысуынан бас тартып, істі тек судьяның қарауын сұрады.

Ернар Жиембайдың төрт адвокаты бар. Ал оның әкесі Жиембай Пралиев қоғамдық қорғаушысы ретінде танылды.

Алдын ала тыңдалымда мемлекеттік айыптаушы айыптау актісін оқыды. Онда «Тұрғын үй Шымкент» ЖШС бұрынғы басшысы Ернар Жиембайдың қылмысты қалай жасағаны айтылды. Прокурор ақпаратына сүйенсек, Ернар Жиембай Берденовке шабуылды масаң күйде жасаған. Ол кешкі сағат жетілер шамасында  әкімдік ғимаратына келіп, Берденовті күтіп 20:55 шамасында ғимараттан шыққан сәтте жүгіріп барып 5 рет оқ атқан. Кейін жерде жатқанын көріп, қасына барып, соңғы рет нақты өлтірмек болып атқалы жатқанда Бердкеновтың жүргізушісі көлікпен келіп Жиенбайды қағыпр өтеді Жараланғанына қарамастан Берденов Жиембай шамасы келгенше алысқан екен.

«Шымкент қаласы әкімдігінің құрылыс нысандарын мониторинг жүргізу басқармасының басшысы Кенжебаевтан ұялы телефон арқылы Шымкент қаласының әкімінің орынбасары Берденов «Тұрғын үй Шымкен» ЖШС лауазымынан өз еркімен арыз жазып кетсін деген туралы айтқанын естіп, адам өлтіруге қатысты қасақана қылмыстық ойы пайда болды. Сөйтіп, «Тұрғын үй Шымкент» ЖШС ғимаратынан шығып, спирттік ішімдік сатып алып, танысынан аңшылыққа пайдалану үшін мылтық сұрады», – деді прокурор. 

  Фото: Orda.kz

Сотта Ернар Жиембай тергеу кезінде өзіне қысым көрсетілгенін мәлімдеді. Алайда қоғамдық қорғаушы ретінде сөз сөйлеген әкесі бұл мәлімдемені жоққа шығарды.

Ал жәбірленуші Руслан Берденовтің адвокаты істі қайта тергеуге жіберуді талап етті. Оның айтуынша, қастандық қоғамдық жерде жасалғандықтан, айыпқа «бұзақылық» бабы да қосылуы керек. Алайда бұл өтінішке не прокурорлар, не айыпталушының қорғаушылары негіз жоқ деп жауап берді. Сот бұл талапты қанағаттандырмады. 

Келесі сот отырысы 6 тамызға белгіленді. Берденовтің адвокатының айтуынша, алдағы сот отырысына қала әкімінің орынбасары қатыспақ. Бұл жолы жәбірленуші денсаулығына байланысты келе алмады.

Автор: Назерке Еркінбекқызы