Руслан Берденовке оқ атқан күдікті жайлы не белгілі болды?

Шымкентте Руслан Берденовке жасалған шабуылға байланысты тергеу жүріп жатыр. Әкімнің орынбасарына бес рет оқ атылған. Күдікті қамауға алынды. Orda.kz тілшілері күдіктіге қатысты кейбір деректерді анықтады.

Шабуыл жасаған адамның аты-жөні — Ернар Жиенбай. Күдіктінің бұрынғы сыныптастары мен таныстарының айтуынша, ол Шымкент қаласындағы №50 мектепте оқыды, бірақ бұл мектепке тек 11-сыныпта келген. Отбасының құқық қорғау органдарында таныстары бар деген дерек бар. Әкесі прокуратурада жұмыс істеген деген мәлімет те шықты.

2024 жылы Жиенбай «Тұрғын үй Шымкент» ЖШС-нің директоры болып тағайындалған. Бұл ұйым мемлекеттік бағдарламалар аясында көпқабатты үйлерді жөндеу жұмыстарымен айналысады.

Әлеуметтік желідегі парақшасында ол жұмысқа қатысты жаңалықтарды жиі салып отырған.

«1 шілдеден бастап «Тұрғын үй Шымкент» ЖШС-нің директоры қызметіне тағайындалдым. Біздің ұйым қаладағы тозығы жеткен үйлерге күрделі жөндеу жүргізумен айналысады. Баршаңызды қаламызды бірге дамытуға шақырамын!» деп жазды Ернар Жиенбай өткен жазда.

Жаңа қызметінде ол бір жылдан аз уақыт жұмыс істеген.

Қазіргі уақытта тергеу жалғасып жатыр. Күдіктінің неге шабуыл жасағаны жайлы әзірге ресми түрде мәлімдеме жасалған жоқ.