Руслан Берденовке Алматыдан дәрігерлер консилиумы барады

Шымкент қаласы әкімінің орынбасары Руслан Берденовтің жағдайына байланысты Алматыдан келген дәрігерлер консилиум өткізеді, деп хабарлайды Orda.kz.

Respublica партиясының тең төрағасы, кәсіпкер Бейбіт Әлібековтің айтуынша, Берденовтің жағдайы әлі де орташа ауыр, бірақ тұрақты.

«Русланның жағдайы – орташа ауыр, бірақ тұрақты. Жақын күндері Алматыдан келген дәрігерлермен консилиум өтеді. Көңіл-күйі жақсы, сенімі мықты», – деп жазды Әлібеков. 

Сонымен қатар, мәжіліс депутаты Болатбек Әлиев те Шымкент қаласы әкімінің орынбасарының жағдайына қатысты пікір білдірді.

«Бүгін таңертең Шымкенттегі ауруханаға ұшып келдім. Онда Руслан Берденов жатыр. Оның жағдайы – орташа ауырлықта, қазір жансақтау бөлімінде. Есін біледі, сөйлесіп отыр, көңіл-күйі жақсы, жігері мықты. Барлық әріптестеріне және достарына сәлем айтты. Нағыз азамат. Жарайсың, Руслан! Өзімді ұстай алмай, маңдайынан иіскеп алдым. Мен оның әке-шешесін жақсы танимын, өзіміз де бірге жұмыс істегенбіз», – деп жазды мәжілісмен әлеуметтік желіде.