Руслан Берденов қызметінен кетті

Respublica партиясының тең төрағасы болған және қазіргі таңда Шымкент қаласы әкімінің орынбасары қызметін атқарып жүрген Руслан Берденов партиялық лауазымынан ресми түрде кетті, деп хабарлайды Orda.kz.

Бұл ақпаратты партияның баспасөз қызметі растады.

Руслан Берденовтің саясаттағы белсенді қызметі 2023 жылдан бастап көзге түсе бастады. Ол мәжіліс депутаты болған. Алайда биыл, 24 ақпанда Шымкент қаласы әкімінің орынбасары болып тағайындалуына байланысты, депутаттық мандатын өз еркімен тапсырды.

Дегенмен Берденов әкімдіктегі жаңа қызметінде ұзақ уақыт жұмыс істеп үлгермеді. 21 сәуір күні оған қарсы шабуыл жасалып, ауыр жарақатпен ауруханаға жеткізілді. Дәрігерлер шұғыл ота жасап, өмірін сақтап қалу үшін барын салды. Бұл жағдай қоғамда үлкен резонанс тудырып, әлеуметтік желілер мен бұқаралық ақпарат құралдарында түрлі болжамдар мен пікірлер айтылды.

Берденовке жасалған шабуыл бойынша қозғалған қылмыстық істің тергеуі жақында ғана аяқталды.

Алайда Руслан Берденов әлі күнге дейін қызметіне оралған жоқ. Шымкент қаласы әкімдігінің мәліметінше, ол қазір ресми түрде денсаулығына байланысты еңбек демалысында. Оның орнына әкім орынбасарының міндетін уақытша Шымкент әкімінің бірінші орынбасары Қуаныш Асылов атқарып отыр.