Роза Рымбаеваның Ақтаудағы концертіне небәрі 50 адам жиналды

Танымал әнші Амал мерекесіне орай 14 наурыз күні Ақтауда концерт берді. Бірақ халық аз жиналып, ол азғантай аудиторияға өнер көрсетуге мәжбүр болды, деп хабарлайды Orda.kz.

Роза Рымбаева ашық сахнада өнер көрсеткен алаңға небәрі 50 адам жиналды. Inaktau -дың хабарлауынша, бұл күні құтқару қызметі облыстың барлық тұрғындарына секундына 20 метрге жететін дауыл соғатыны туралы ескерту таратқан. Ауа-райының қолайсыздығына қарамастан әнші концерттен бас тартпай, халық алдындағы парызын өтеп шықты.

«Біз концертті тоқтатуға ұсыныс жасадық, бірақ Роза Рымбаева үзілді-кесілді қарсы болды. Ақтаулықтар қашаннан ынтымақты халық, бұл қаланы аптап ыстықта, қақаған аязда, қатты желде, сусыз далада тұрғызған. Ендеше бұл концерт ақтаулықтарға деген құрмет», – дейді шара ұйымдастырушылары.

Дегенмен әлеуметтік желіде жұртшылық әншінің Ақтауға келгенінен бейхабар екенін жазып жатыр. Соған қарағанда ұйымдастырушылар көп нәрсені ескермеген сыңайлы, себебі әнші тура ауызашар уақытында өнер көрсеткен.

Алдағы уақытта Роза Рымбаева Қайрат Нұртаспен бірге Наурыз мерекесіне орай Павлодарда өнер көрсетуді жоспарлап отыр. Қала әкімдігінің мәліметінше, әртістердің концертіне 10 миллион теңге жұмсалады. Солтүстікте болатын концертте ұйымдастырушылар бұндай олқылықтарға жол бермейді деп сенеміз.