«Росатом» Қазақстанда АЭС салатынына сенімді

Қазақстан билігі ел аумағында алғашқы атом электр станциясын салу бойынша Ресеймен «ортақ шешімге келу» мүмкіндігін талқылауда. Бұл туралы «Росатом» корпорациясының басшысы Алексей Лихачёв мәлімдеді, деп жазады Orda.kz.

РИА Новости агенттігінің мәліметінше, Лихачёв Қазақстан мен Ресей АЭС құрылысын бірлесіп жүргізуі мүмкін екенін айтты. Мұндай қорытындыны ол 30 қаңтарда екі елдің премьер-министрлері — Олжас Бектенов пен Михаил Мишустин арасындағы келіссөздер «контексінен» шығарған.

«Бүгін екі ел үкімет басшыларының кездесуінде өткен талқылаулардың контекстіне сүйене отырып, біз ортақ шешімдерге қарай бет алып келеміз деп қорытынды жасауға болады. Қазірдің өзінде өте белсенді жұмыс істеп, ынтымақтастық орнатып жатырмыз», – деді «Росатом» басшысы журналистерге.

Алексей Лихачёв Қазақстан билігінің АЭС құрылысы мәселесін «кәсіби түрде зерттеп жатқанын» атап өтті. Ол жақында қазақстандық делегацияның Ресейге барып, елдің атом энергетикасы жүйесімен танысқанын еске салды. Алайда, ол бұған дейін энергетика министрі Алмасадам Сәтқалиевтің дәл осындай сапарларды Оңтүстік Корея, Қытай және Францияға да жасағанын атап өтпеді.

Лихачёвтың пікірлеріне қарағанда, ол «Росатомның» Қазақстандағы алғашқы АЭС құрылысын жүргізуі іс жүзінде шешілген мәселе деп санайды.

«Мұнда біз ерекше ықыласпен жұмыс істейміз», – деді Алексей Лихачёв.

Қасым-Жомарт Тоқаев Қазақстандағы атом электр станциясын халықаралық консорциум салуы тиіс екенін айтқан. Оның құрамына Корея, Франция, Қытай және Ресей компаниялары кіруі мүмкін. Қазіргі уақытта бұл елдер жобаға қатысу үшін қызу бәсекелесуде.