«РОП операторының» бұрынғы құрылтайшысы елге экстрадицияланды

«РОП операторының» бұрынғы құрылтайшысы Шынар Мұқтарова Қазақстанға экстрадицияланды, деп хабарлайды ҚР Сыбайлас жемқорлыққа қарсы іс-қимыл агенттігі.

«Сыбайлас жемқорлыққа қарсы қызмет Қазақстан Республикасы Бас прокуратурасының және Интерполдың көмегімен Біріккен Араб Әмірліктерінен Қазақстанға «РОП Операторы» ЖШС бұрынғы құрылтайшысы, халықаралық іздеуде жүрген Ш.Мұқтарованы экстрадициялады» делінген мәлімдемеде.

Ш.Мұқтарова «РОП Оператор» ЖШС бас директоры С.Коротенконың қатысуымен 920 млн теңге жымқырды деген күдікке ілінген болатын. 27 шілде күні сағат 19:01-де Мұқтарова Астана әуежайында ұсталып, уақытша ұстау изоляторына қамалды.

Ескерерлігі, жұрт Шынар Мұқтарованы еліміздің экс-президенті Нұрсұлтан Назарбаевтың кенже қызы Әлия Назарбаеваның жақын адамы ретінде біледі.

Еске салайық, 11 қаңтарда президент Қасым-Жомарт Тоқаев «РОП Оператор» ЖШС-ін қалдықтарды жинауды жүзеге асыруға монополиялық құқығынан айыруды тапсырған болатын. Мұны шет елдердегідей мемлекеттік ұйым жасау керектігін қадап айтты. 

Алымдардға келетін болсақ, мемлекет басшысының пікірінше, олардың мөлшерлемесін қайта қарасытыру керек. Нәтижесінде құрылым қайта өңдеуді жүзеге асыру құқығынан айырылып, мемлекет бақылауына өтті. 

19 қаңтарда Әлия Назарбаевамен байланысты «РОП операторы»  ақы алу құқығынан айырылды.   11 наурызда «РОП Операторының» бұрынғы басшылығына қатысты қылмыстық іс қозғалғаны белгілі болды.

«РОП Оператор» ЖШС бұрынғы құрылтайшысы Шынар Мұқтароваға  іздеу жарияланған болатын.