Роман Скляр «Павлодарэнерго» басшысының жұмысын сынады

Екібастұзға жұмыс сапары барысында Қазақстан Республикасы Премьер-Министрінің бірінші орынбасары Роман Скляр «Павлодарэнерго» АҚ бас директорының жұмысын қатаң сынға алды.

Осыдан кейін ол «ОАЭК» АҚ директорлар кеңесі мүшелерінің біріне телефон шалып, олигарх Клебановтың бақылауындағы акционерлік қоғамның жергілікті басшысын қызметінен босату туралы мәселе қойды.

Pavlodarnews.kz хабарлағандай, Роман Скляр Павлодар облысына жұмыс сапары барысында тұрғын үйлерді және жалпы қаланы жылумен қамтамасыз етуді реттеу мәселесі қалай шешіліп жатқанын сұрады. «Павлодарэнерго» АҚ бас директоры Вадим Лесиннің жауабы Роман Склярды қанағаттандырмады.

— Сіздің мына жауабыңыз қарапайым  адамдарға ештеңе бермейді, оларға пәтерлерінің  жылы болғаны керек. Сізге мәселені шешу жүктелді: 65-66 градус температурада және қажетті гидравликалық жағдайда ғана қалыпты температураға қол жеткізе аласыз. Бұл жақсы емес. Сіз менің нұсқауларымды орындамағаныңызбен қоймай, жағдайды  түсіндіре алмайсыз, - деді Скляр.

Осыдан кейін Скляр «ОАЭК» АҚ директорлар кеңесінің мүшесі Сергей Канмен телефон арқылы сөйлесіп, жауапты басшыны жұмыстан босату мәселесін шешті.

Премьер-Министрдің бірінші орынбасары сапар барысында  бірқатар мектептерді аралап, жылу электр орталығындағы температуралық режимді тексеріп, «тапсырылған істер аясында жылу электр орталығындағы жұмысты реттеуге болатынын» атап өтті.

Роман Скляр барлық оқу орындарын келесі аптаның басына дейін дайындап, 13 ақпаннан бастап мектептерде балаларды оқытуды бастауды талап етті.

Сонымен қатар бүгін Қостанай облысына Қазақстан Республикасы Энергетика вице-министрі Жандос Нұрмағанбетов жұмыс сапарымен келді. Ол Қостанай және Рудный жылу электр стансаларының жұмысымен танысуы керек.