Роман Скляр ТЖМ-ге көктемгі су тасқыны мен өрт қауіпсіздігіне маусымдық дайындықты бастауды тапсырды

2020 жылы қазақстандық құтқарушылар 70 мың шақыртуға шыққан.  

Премьер-министрдің орынбасары Роман Скляр Төтенше жағдайлар министрлігі алқасының отырысына қатысты, деп хабарлады министрлер кабинеті басшысының сайты.

Төтенше жағдайлар министрі Юрий Ильин департаменттің өткен жылдағы қызметі мен алдағы кезеңге арналған міндеттері туралы айтты. 2020 жылы құтқарушылар 70 000 құтқару миссиясына шыққан. Төтенше жағдайлар министрлігінің қызметкерлері 14 мың адамды құтқарды, төтенше жағдайлар аймағынан 19 мың адам эвакуацияланды. 4 мың зардап шегушіге алғашқы медициналық көмек көрсетілді.

Роман Скляр 2020 жылы төтенше жағдайлардың алдын алу және жою, тұрғындар мен аумақтарды қорғау саласындағы біртұтас мемлекеттік саясатты іске асыру бойынша айтарлықтай жұмыстар атқарылғанын атап өтті. Сонымен қатар, Премьер-Министрдің орынбасары Елбасының Қазақстан халқына Жолдауындағы тапсырмаларды, халықтың табиғи және техногендік сипаттағы төтенше жағдайлардан қауіпсіздігін қамтамасыз етуге бағытталған үкіметтік бағдарламалық құжаттардың уақтылы орындалуының маңыздылығын еске салды.

Роман Скляр министрлікке қыс мезгілінің аяқталуын бақылауда ұстап, көктемгі су тасқыны мен өрт маусымына дайындықты бастауды тапсырды. Сондай-ақ, ол өңірлердегі жұмыстарды талдау, төтенше жағдайларды жою саласындағы мемлекеттік басқару жүйесін жетілдіру тетіктерін анықтау қажеттілігіне назар аударды.