Ringobet.kz букмекерлік кеңсесі лицензиясынан айырылды

Қазақстандағы Ringobet.kz букмекерлік кеңсесі заңды бұзғаны үшін лицензиясынан айырылды.

Бұл туралы туризм және спорт министрлігінің баспасөз қызметі хабарлайды.

Ringobet.kz букмекерлік кеңсесі заңды бұзғаны үшін лицензиясынан айырылып, айыппұл салынды. Оған сәуір айында жоспардан тыс тексеру жүргізілді. Заңға сәйкес, бәске тігу қабылдайтын сервер Қазақстанда орналасуы керек. Компания бұл талапты бұзған.

«Сонымен қатар, букмекерлік кеңсені басқаруға лицензия алу кезінде олар көрінеу жалған ақпарат берген. Осыған байланысты букмекерлік кеңсе ҚР ӘҚБтК-нің 464-бабының 1 және 2-бөлігі бойынша әкімшілік жауапкершілікке тартылып,  жалпы сомасы 849 мың теңге айыппұл салынып, букмекерлік кеңсені басқару лицензиясынан айырылды» делінген хабарламада.

Кәсіпорын сайтында министрліктің 23 сәуірдегі бұйрығына сәйкес лицензияның күші жойылды деп жазылды.