Риддер ЖЭО-да өткен жылғы оқиға қайталанбауы керек - Роман Скляр

Риддер ЖЭО-да жөндеу жұмыстары аяқталуда, ол қазірдің өзінде 80 пайыздан астам орындалды. Орта қысымды қазандықтар жуылып жатыр, содан кейін олардың қысымын сынау басталады.

 Үш қазандық қондырғының екеуі 1 қазанға дейін іске қосылады. Біреуі резервте болады. Шамамен 25 қыркүйектен кейін Риддер тұрғындарының үйлерінде жаз бойы болмаған ыстық су мен жылу келуі тиіс.

Бұл туралы кеше жұмыс сапарымен «Риддер жылу электр орталығы» АҚ-да болған еліміздің премьер-министрінің бірінші орынбасары Роман Скляр айтты.

«Орта қысымды қазандықтарды жуу бейсенбіде басталды, содан кейін қысымды сынау жоспарлануда. Гидравликалық сынақтар кезінде анықталған барлық кемшіліктерден кейін қазандықтар тоқтатылады, түзетіледі және дайындалады. Қыркүйек айының соңына дейін қалаға ыстық су беріліп, сыртқы ауа температурасына қарай жылуды қосамыз деп жоспарлануда. Біз үш қазандықты іске қосамыз, оның екеуі жұмыс істейді, бұл жылу маусымын -10 градусқа дейін суықта үзіліссіз қамтамасыз етуге жеткілікті», - деді Риддер қаласының әкімі Дәулет Батырбаев.

Үш жоғары қысымды қазандық әлі де күрделі жөндеуден өтуде. ЖЭО-ның барлық алты қазандығы қарашаның 15-інен кейін іске қосылады. Станцияның жылыту маусымына іс жүзінде дайын болғанына қарамастан, салынып жатқан «Қазмырыш» ЖШС қазандығы резерв ретінде қаланы жылумен қамту жүйесіне қосылады.

«Жүргізілген жөндеу жұмыстарын ескере отырып, біз ЖЭО-ның қуаты жеткіліксіз болады деп ойламаймыз, бірақ күтпеген жағдайлар туындаса, ең жоғары жүктеме кезінде «Қазмырыш» қазандығы бізге көмектеседі», - деп түсіндірді Шығыс Қазақстан облысы әкімінің орынбасары Бақытжан Байахметов.

Жылу электр орталығында кейбір жұмыс түрлері әлі аяқталмаған: жаңа күл үйіндісін салу, аспирациялық және желдету жүйесін орнату, ғимараттың терезелері мен қабырғаларын қалпына келтіру және т.б. Дегенмен, олардың барлығы жақын арада аяқталады деп жоспарлануда.

«Көп жұмыс жасалды, былтырғы оқиға қайталанбауы керек екені анық. Қаланы жылумен толық қамтамасыз ету керек, бұған еш күмәніміз жоқ, өйткені жұмыс аяқталуға жақын», - деп атап өтті өз кезегінде Қазақстан Республикасы Премьер-Министрінің бірінші орынбасары Роман Скляр. 

Бүкіл ел Риддер жылу электр орталығындағы жағдайды бақылап отыр. Қыс бойы жылу электр орталығында бірінен кейін бірі болған апаттар, қала тұрғындарының өз  пәтерлерінде қатып қалғаны сабақ болуы тиіс.