Reuters: Трамп Қазақстанды Израильдің серіктесіне айналдырмақшы

АҚШ президенті Дональд Трамп Орталық Азия елдерін, соның ішінде Қазақстанды, Израиль мен ислам мемлекеттері арасындағы ынтымақтастық туралы «Авраам келісімдеріне» қосу мүмкіндігін қарастырып жатыр, деп хабарлайды Orda.kz.

Reuters агенттігі бес дереккөзге сілтеме жасап, Трамп әкімшілігі «Авраам келісімдеріне» жаңа қатысушыларды қосу мүмкіндігін белсенді түрде талқылап жатыр. Қазіргі уақытта бұл тізімдегі алғашқы үміткер — Әзірбайжан.

Израиль мен ислам мемлекеттері арасындағы бұл келісімдер 2020–2021 жылдары, Трамптың алғашқы президенттік мерзімі кезінде жасала бастады. АҚШ-тың делдалдығымен төрт мұсылман елі Тель-Авивпен қарым-қатынасты қалыпқа келтіруге келісім берген.

Reuters агенттігі Орталық Азия елдерінің Израильмен бұрыннан қалыптасқан сауда және дипломатиялық қатынастары бар екенін атап өтеді. Сондықтан олардың «Авраам келісімдеріне» қосылуы — саяси символизм ретінде қабылдануы мүмкін және бұл қадам Сауд Арабиясына қысым жасауға бағытталуы ықтимал.

«Бұл талқылаулар аясында Әзірбайжан шенеуніктері Орталық Азия елдеріндегі әріптестерімен, соның ішінде Қазақстанмен байланысқа шыққан. Мақсат — «Авраам келісімдерін» кеңейтуге деген қызығушылықты бағалау. Алайда олар тағы қай елдерге жүгінгені әзірге белгісіз» деп жазады Reuters.

АҚШ мемлекеттік департаменті Израильмен ынтымақтастыққа шақырғысы келетін елдердің тізімін айтпаса да, «Авраам келісімдерін» кеңейту Дональд Трамптың сыртқы саясатындағы басым бағыттардың бірі екенін растады.