Ресми: Нұр-Сұлтан-Шымкент әуе рейсінде жолаушы қаза тапты

15 қырқүйек күні Нұр-Cұлтан-Шымкент әуе рейсінің жолаушысы қайтыс болғанын ресми түрде расталды.

Бұл туралы Orda.kz хабарлайды.

- Ұшу кезінде кабиналық экипажға жолаушы өзін нашар сезінетіндігі және шұғыл көмек қажет екендігі туралы хабар түсті. Бортсерік жолаушы отырған жерге келгенде, ол ес-түссіз болды. Тексеру кезінде тамыр соғысы мен тынысы болмаған, – делінген Qazaq Air әуе компаниясы баспасөз қызметінің хабарламасында.

Хабарламада айтылғандай, әуе кемесінің командиріне есеп беріліп, жолаушылар арасында көмек сұралды.

- Бұл рейспен ұшқан дәрігер аға бортсерікпен бірге бортта медициналық көмек көрсету жөніндегі нұсқаулыққа сәйкес жүрек-өкпе реанимациясы жүргізді. Әуе кемесінің командирі жақын маңдағы әуежайға шұғыл қонуға шешім қабылдады. Әуе диспетчерлері арқылы экипаж оқиға туралы егжей-тегжейлі хабарлап, жедел медициналық көмек сұрады. Жезқазған қаласының әуежайына қонғаннан кейін ұшақ бортына келген дәрігерлер жолаушының қайтыс болғанын хабарлады, - делінген хабарламада.