Өрескел қателік. КВИ-ден қайтыс болғандардың мәйіті ауысып кеткен

Елордада мәйітхана қызметкерлері қайтыс болған адамның денесін КВИ-ден көз жұмған адамның денесімен шатастырып алған. Өрескел қателікті марқұмның туыстары анықтаған.

Бұл туралы Orda.kz КТК телеарнасына сілтеме жасап хабарлады.

– Марқұмның балалары мәйітті ашып тексергенде, ішінен басқа адам шыққан. Біз шу шығардық. Кейін олар мәйіттерді шатастырып алғанын мойындады. «Денесі қайда?» деп сұрасақ, «Таразға ұшып кетті ме?» деп жауап берді, - дейді марқұм Кәкен Жантайұлының туысы.

Ал Таразда марқұмның туыстары мәйіттердің ауысып кеткенін мүлде білмеген. Олар денесін мәйітханада тексеріп алғандықтан, оны ашып та қарамаған. Жерлеу рәсіміне дайындалып, тіпті басқа адамның денесі келгенін білмеген.

Мәйітхананың айтуынша, бұл сасқалақтап қалған лаборанттың кінәсінен болған. Қателікті жөндеу үшін мәйіттер қайта қайтарылды. Медициналық орталықтың кінәлі қызметкері көлік ақысын өз қалтасынан төледі. Олар марқұмдардың туыстарынан кешірім сұрап отыр.

Марқұмның туыстары сотқа жүгінуге ниетті.

– Өлім туралы куәлік түстен кейін берілді, ал кешке тек бір лаборант жұмыс істеді. Ол қайтыс болған науқасты кешкі сағат тоғызда бетін ашып, ұлына көрсетті. Баласы оны таныды. Қайтыс болған науқастардың туыстарынан кешірім сұраймыз, - деп түсіндірді Нұр-Сұлтандағы көпсалалы медициналық орталық директорының орынбасары Бақтыбай Оразбеков.