Ресейліктер дауыс беру үшін бір шақырымға созылған кезекке тұрды

Алматы мен Астанада мыңдаған ресейліктер дауыс беру үшін бір шақырымға созылған кезекке тұрды, деп хабарлайды Orda.kz.      

Бүгін президент сайлауына дауыс беру өтіп жатқан Алматыдағы Ресей консулдығына Orda.kz тілшісі де барды. Шамамен болжам бойынша, түскі уақытта ғимарат маңына 3 мыңға жуық адам жиналды. Адамдар арты артынан ағылып келуді жалғастыруда.

Консулдықта орналасқан учаскелерге арналған екі кезек желісі Манас көшесінен басталып, 1,5 шақырымнан астамға созылып жатыр. Халық бір жарым-екі сағат күтіп тұрып, дауыс беріп шығып жатыр.

Тілшіміз хабарлағандай, полицейлер дауыс беруге ниет білдіргендердің құжаттарын тексеріп жатыр.

Кезек минутына шамамен бір метр жылдамдықпен қозғалады.

Қазақстанды паналаған  ресейліктер  Астанада да президент сайлауында дауыс бере алады. Онда Кенесары 39 мекенжайы бойынша «орыс үйінде» дауыс беру қызметі ұйымдастырылған. 

13:00-де ғимараттың жанында мыңнан астам адам болған. Ұзын кезек Әуезов көшесінен басталып, Кенесары көшесіне дейін созылып жатыр.

Естеріңізге сала кетейік, ресейлік оппозиционерлер өз жақтастарын «Полдень против Путина» акциясына қатысуға шақырған болатын. Қатысқысы келгендердің барлығы сағат 12.00-де сайлау учаскелерінде келуі керек болған.