Ресейлік кәсіпкер Қазақстаннан ұшақ сатып алды ма?

Қазақстан Республикасының Көлік министрлігі санкцияларды айналып өтіп, Ресейлік кәсіпкердің қазақстандық тасымалдаушыдан Falcon 7X ұшағын сатып алғаны туралы БАҚ-та тараған ақпарат шындыққа жанаспайтынын мәлімдеді, деп хабарлайды Orda.kz.

«Әуе кемесінің бұл түрі бұрын-соңды Қазақстанның азаматтық әуе кемелерінің мемлекеттік тізіліміне енгізілген емес. «Irtysh Air» әуе компаниясының қазіргі уақытта азаматтық әуе кемелерін пайдаланушы сертификаты жоқ және 10 жылға жуық ұшу орындамаған. Әуе компаниясы бұрын-соңды мұндай ұшақ түрін пайдаланбаған» деп  мәлімдеді Азаматттық авиация комитеті.

Бұған дейін «Вёрстка» басылымы санкцияға ұшыраған ресейлік миллиардер Олег Дерипасканың Falcon 7X бизнес-джет сатып алғанын жазған болатын. 

«Ресейде тіркелгеннен кейін бизнес-джет RA-09618 борт нөмірін алды. Оның кейбір ұшулары Олег Дерипаска ұшқан жерлермен сәйкес келеді» деп жазады басылым. 

Басылымның жазуынша бұл кеме қазақстандық «Irtysh Air» компаниясынан кәсіпкерке қатысы бар компания арқылы 36 миллион долларға сатып алынған. Ресейге 2023 жылдың ақпан айында жеткізілген.