Ресейлік блогер Алматыға келіп айыппұл арқалады

Ресейлік белгілі блогер Гусейн Гасанов Алматыда карантин талаптарын бұзғаны үшін айыппұл төледі.

Ресейлік блогер Алматыға келіп, өзінің жазылушыларымен кездеспекші болды. Бұл оқиғаға байланысты Алматы қаласы санитарлық-эпидемиологиялық бақылау департаменті әкімшілік хаттама толтырды. Ресейлік блогерге 30 АЕК көлемінде (87 мың теңгеден сәл артық)  айыппұл салынды.

Қала қызыл аймақта болғанына және ескертуге қарамастан, Гасановтың фан-кездесуіне мыңдаған адам жиналды.  Бірақ бұл жоспарланған жиынды полицейлер дер кезінде тоқтатып, халықтың көп көлемде топтасуына жол бермеді.

Бұған дейін желіде Гасановтың көлігі бар бейнежазба тарап, оның көлігін полиция алып жүреді делінген. Департамент бұл фактінің тексеріліп жатқанын, нәтижесі кейін белгілі болатынын хабарлады.

Гусейн Гасановтың өз елінде көлік жүргізу құқығы шектетілгенін естеріңізге саламыз.