«Ресейдің дегені болмауы керек»: Франция ядролық қару жайлы пікірталас бастамақ

Франция президенті ұлтқа жолдауында елдің ядролық стратегиясы мен Еуропа қауіпсіздігіне қатысты өткір мәлімдеме жасады. Ол француз ядролық қаруын одақтастарды қорғау мақсатында қолдану мәселесі бойынша «стратегиялық пікірталастардың» басталатынын жариялап, Украинадағы ықтимал уақытша бітімге қарсы шықты. Макронның айтуынша, бейбітшілік Ресейдің шарттарымен орнамауы тиіс, деп хабарлайды Orda.kz Елисей сарайының ресми сайтына сілтеме жасап.

Эммануэль Макрон Францияның ядролық ұстамдылық саясаты Еуропа одақтастарының қауіпсіздігін қамтамасыз етуде қандай рөл атқаратынын талқылауға ниетті екенін мәлімдеді. Ұлыбритания ЕО-дан шықаннан кейін Франция – ядролық арсеналға ие одақ құрамындағы жалғыз ел болып қалды.

Өз сөзінде Макрон Украинадағы уақытша бітімге қарсы екенін білдірді. Оның пайымдауынша, мұндай келісім «тым әлсіз» болуы мүмкін.

«Украинадан бас тарту арқылы бейбітшілікке қол жеткізу мүмкін емес. Бейбітшілік қандай да бір құнға болсын орнай салатын дүние емес және Ресейдің шарттарына сай құрылмауы тиіс», – деді Франция басшысы. 

Ол сондай-ақ Франция Украинада бейбіт келісімдер жасалған жағдайда олардың орындалуын бақылау үшін өз әскерін жіберуге дайын екенін мәлімдеді. Макронның айтуынша, Еуропа күштері ұрыс қимылдарына араласпайды, бірақ бейбітшілік орнауын қамтамасыз ете алады. Бұл мәселені талқылау үшін Франция миссияға қатысуға дайын елдердің штаб бастықтарын жинауды жоспарлап отыр.

«Біздің одақтасымыз – Америка – Украинаға бұрынғыдай қолдау көрсете бермейді және болашаққа қатысты сұрақтар туындай бастады. Біздің қауіпсіздігіміз бен әл-ауқатымыз бұрынғыдан да белгісіз күйде. Біз жаңа дәуірге қадам бастық», – деді ол.