Ресей елшісін өлтіргендер өмір бойына бас бостандығынан айрылды

Түркияда Ресей елшісі Андрей Карловты өлтірді деп айыпталған бес адам өмір бойына бас бостандықтарынан айрылды. Шешімді Анкарадағы сот 9 наурызда қабылдады, деп хабарлайды Anadolu агенттігі.

Дипломат 2016 жылдың желтоқсанында заманауи өнер галереясындағы көрменің ашылуында атылды.

Кісі өлтірушіні билік 22 жастағы полиция қызметкері Мевлют Мерт Алтынташ деп анықтады. Оны оқиға орнында арнайы жасақ атып өлтірді. Барлығы бұл іс бойынша 28 адам айыпталды. Алтауы ақталды, бірнешеуі сырттай сотталды, қалғандары әртүрлі түрме жазаларын алады.

Сот қолдаған тергеу нұсқасына сәйкес, қылмысты ұйымдастырушылар қазір АҚШ-та тұратын ықпалды уағызшы Фетхулла Гүленнің жақтастары болған. Бұрын билік оны 2016 жылы әскери төңкеріс әрекетін ұйымдастырды деп айыптап, бүкіл ел бойынша оның мыңдаған ізбасарлары қамауға алынған. Гүлен қастандыққа қатысы бар екенін жоққа шығарды.

Дипломаттың жесірі Марина Карлова BBC орыс қызметіне берген сұхбатында күйеуіне төрт ай бұрын қоқан-лоққы көрсетілгенін айтты. Бірақ оған қосымша қорғаныс берілмеген.

Карлова тергеу қылмыстың нақты ұйымдастырушыларын тапты дегенге сенбейтіндігін айтты.

– Мен бұл іс ешқашан шешілмейтініне сенімдімін, деді ол.