Ресейден келетін жүк көліктері Қазақстан шекарасынан өту үшін алдын ала кезекке жазыла алады

1 қарашадан бастап Қазақстан-Ресей шекарасында Солтүстік Қазақстан облысындағы «Бидайық» автомобиль өткізу бекетінде CarGoRuqsat электронды кезекті қолдану бойынша пилоттық жоба жұмыс істеп жатыр. «CarGoRuqsat» тасымалдаушыларға Ресей шекарасын кесіп өту үшін кезекті алдын ала брондау мүмкіндігін береді, деп хабарлайды Қазақстан Республикасы Қаржы министрлігі Мемлекеттік кірістер комитетінің сайты.

«Электрондық кезекті пайдалану шекарадан өтудің ашықтығы мен тиімділігін қамтамасыз етуге мүмкіндік береді және жүк көліктерінің жиналуын болдырмауға көмектеседі»  деп атап өтті Мемлекеттік кірістер комитеті.

«CarGoRuqsat» мемлекеттік органдардың 13 ақпараттық жүйесімен біріктірілген, бұл кейбір басқару функцияларын автоматтандыруға және адам факторын жоюға мүмкіндік берді. Осылайша, электронды кезекті брондау сатысында сақтандыру полистерінің, тасымалдау рұқсаттарының, ақылы жолдардағы қарыздың және т.б. бар-жоғы бақыланады.

Пилоттық жоба басталған 10 күн ішінде CarGoRuqsat-та 123 жүк көлігі электронды кезекке тұрды, оның ішінде 79 көлік Ресейге жол тартты, 44 көлік тапсырыс бойынша бақылау-өткізу пунктіне келеді.

«Ешқандай заң бұзушылықтары жоқ  тасымалдаушылар электронды кезектің енгізілгенін жақсы қабылдап, шекарадан өту жылдамдатылып,  10-15 минут ішінде шешілетініне қуанышты» деп хабарлады комитет.

Жалпы, «Бидайық» өткізу пункті штаттық режимде жұмыс істеп тұр, жүк көліктерінің жинақталуы байқалмайды.

Барлық сұрақтар бойынша МКК  байланыс орталығына 1414, 8-800-080-7777 телефондары бойынша хабарласуға болады.