Ресейдегі өрт Қазақстанды қара түтінге орады

Тюмень облысындағы өрт салдары Қазақстанға да тиіп жатыр. Павлодар, Солтүстік Қазақстан, Ақмола облыстарын қара түтін басты.

Бұл туралы Orda.kz хабарлады.

– Қара түтін Павлодар облысының аумағында Павлодар, Екібастұз, Ақсу қалаларында және Баянауыл, Ақтоғай, Железинка аудандарында, сондай-ақ екі шекаралас облыстарда байқалады. Түтіннің пайда болуына Ресей Федерациясының Тюмень облысында 48 мың гектар алқапты жалмаған орман өрті себеп болды, - деп жазды Павлодар облысы Төтенше жағдайлар департаментінің баспасөз қызметі.

Қала тұрғындары түтінге оранған аймақтың бейнежазбасын желіде таратты.

Сондай-ақ, 112 нөміріне 20-ға жуық қоңырау түскен.

Павлодар облысы Төтенше жағдайлар департаменті баспасөз қызметінің айтуынша, аймақта ешқандай өрт тіркелмеген.

Еске салсақ, Ресейдің Тюмень облысындағы өрт бірнеше аптадан бері жалғасып келеді.