Ресейдегі қазақстандықтардың қатысуымен болған жаппай төбелес

Министрліктің айтуынша, қазақстандықтар зардап шекпеген. Төбелес ауысыммен жұмыс істейтіндер лагерінде орын алған.

ҚР Сыртқы істер министрлігі Ресей Федерациясының Мурманск облысындағы құрылыс алаңында жұмысшылардың жаппай төбелесуіне Қазақстан азаматтарының қатысы туралы ақпаратты растады, деп хабарлады Orda.kz. ҚазАқпарат-қа сілтеме жасап.

– 23 наурызда, шамамен 20:30-да, Мурманск облысының Белокаменка ауылының жанындағы ірі қуаттылықты теңіз құрылымдары орталығының құрылыс алаңдарының бірінде вахталық жұмысшылардың жаппай төбелесі болды. Оған қазақстандықтар да қатысқан. Оқиға тұрмыстық сипатта болды. Компания өкілдерінің айтуынша, мәселе шешілген және қызметкерлер әдеттегідей жұмыс істеп жатыр. Қолда бар мәліметтерге сәйкес, жарақат алғандар мен қамауда қазақстандықтар жоқ, - деді ҚР Сыртқы істер министрлігінің ресми өкілі Айбек Смадияров.

Оның айтуынша, Санкт-Петербургтегі ҚР Бас консулдығы бұл мәселені бақылауда ұстайды.

Мурманск облысында вахталық жұмысшылардың жаппай төбелесі әлеуметтік желілерден белгілі болды. Облыстық ішкі істер министрлігінің баспасөз қызметі жанжалдан кейін кем дегенде алты адам медициналық көмекке жүгінгенін хабарлады. Олардың барлығына амбулаториялық-емханалық қызмет көрсетілді.