Ресейде сотталған Қазақстан азаматтары соғысқа бара ма?

Ресейде тергеуде жүрген немесе сотталған қазақстандық азаматтар Украинаға соғысқа барады деген ақпарат тараған болатын. Бұл ақпаратты Қазақстан СІМ-нің өкілі Айбек Смадияров жоққа шығарды, деп хабарлайды Orda.kz порталы.

«Бұл қате ақпарат, Қазақстанның Ресей түрмелерінде жазасын өтеп жатқан немесе тергеуде жүрген бірде-бір азаматы әскери әрекетке тартылмаған. Мен сіздерге кепілдік бере аламын», - деді Айбек Смадияров. 

Сонымен қатар Смадияров адасып соғысқа барғысы келген қазақтар жайлы да айтты.

«Қазақстанның 10-ға жуық азаматы тергеуде екендігі туралы фактілер бар. Бірақ біздің мәліметтеріміз бойынша, олар Telegram арналарында, әлеуметтік желілер арқылы жұмыс тауып, сол үшін барған. Біз олармен бірнеше рет байланысқа шықтық, консул оларға бірнеше рет барды, жеке кездесті және барлық айыптаулардың дұрыстығын қадағалап отырды. Оларға консулдық және құқықтық көмек көрсетіліп жатыр», - деді ол. 

Айта кетейік, бұған дейін Ресейдің Украинадағы соғысына Қазақстаннан барған тағы бір адам туралы мәлімет таралған болатын.