Ресейде «шетелдік агенттердің» тізімі кеңейтілді

Ресей билігі «шетелден ақша алатын» шетелдік агенттердің, жеке және заңды тұлғалардың тізімін тағы да кеңейтті.

Бұл жолы «шетелдік агенттер» тізіміне рэпер FACE, журналист Марк Фейгин, ғалым Дмитрий Дубровский, жазушы Андрей Филимонов, Idel.Реалии («Азаттық» радиосы) журналисі Екатерина Маяковская, «Новая газета» журналисі Ирина Тумаков қосылды.

Ресейдегі шетелдік агенттерге «шетелден қаржы алатын» және ел ішінде «саяси қызметпен» айналысатындар жатады, соңғы уақытта елден кеткендер де шетелдік агенттерге жатқызылды.

Көбінесе шетелдік агенттер тізіміне тәуелсіз БАҚ, үкіметтік емес ұйымдар, сонымен қатар 2019 жылдан бері кейбір жеке тұлғалар да  кіреді.

Украинада соғыс басталғаннан кейін шетелдік агенттердің тізімі тез өсе бастады. Кейінгі уақытта Ресей Федерациясы билігі соғысқа қарсы шыққандардың барлығын да осы тізімге кіргізе бастады.